4 noyabr 2026-cı il tarixində İş Adamları Cəmiyyətinin Milli Assosiasiyasının (İCMA) təşkilatçılığı ilə 2026-cı ilin “Şəhərsalma və Memarlıq İli” çərçivəsində tikinti və inşaat materialları sektorunun axşam ziyafəti keçirilib. Meslehetci də tədbirdə iştirak edib.
Radisson Hotel Baku-da təşkil olunan görüş tikinti və inşaat materiallarının istehsalı və satışı, təmir-tikinti, daşınmaz əmlak, memarlıq və dizayn sahələrində fəaliyyət göstərən 150-yə yaxın sahibkarı, şirkət rəhbərini və dövlət qurumlarının nümayəndələrini bir araya gətirib.
Tikinti və inşaat sektorunun nümayəndələri bir araya gəlib
Tədbirdə İCMA İdarə Heyətinin sədri Tural Mustafayev, Azərbaycan Respublikası Milli Məclisinin deputatı, iqtisad elmləri üzrə fəlsəfə doktoru Vüqar Bayramov, Bakı Mühəndislik Universitetinin rektoru Yaqub Piriyev, Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin rəis müavini Elxan Əsədov və Dövlət Vergi Xidmətinin Vergi siyasəti Baş idarəsinin rəisi Nicat İmanov çıxış ediblər.
Həmçinin Kapital Bank ASC-nin İdarə Heyətinin üzvü, Baş Korporativ Satış İnzibatçısı Fərid Hidayətzadə, Minera Group-un təsisçisi Xudaqulu Rzayev, S.I.G.N LTD şirkətinin təsisçisi Elmir Hacıyev, İCMA İdarə Heyətinin üzvü və Pəncərə İstehsalçıları Komissiyasının sədri Fizuli Bayramov tədbirdə çıxış ediblər.
Sektorun inkişaf perspektivləri və biznes əməkdaşlığı müzakirə olunub
Çıxışlar zamanı tikinti və inşaat sektorunun inkişaf perspektivləri, sahədə mövcud çağırışlar, sahibkarlar üçün əməkdaşlıq imkanları və dövlət-biznes münasibətlərinin gücləndirilməsi istiqamətində fikir mübadiləsi aparılıb.
Sektorun inkişafında dövlət və özəl qurumlar arasında koordinasiyanın, təcrübə mübadiləsinin və birbaşa işgüzar əlaqələrin əhəmiyyəti vurğulanıb.
Görüş çərçivəsində tədbirin təşkilinə dəstək göstərən tərəfdaş və sponsor şirkətlərin nümayəndələri təltif olunub, müxtəlif şirkətlərin fəaliyyətini əks etdirən təqdimat videoları nümayiş etdirilib.
Tədbirin tərəfdaşları və sponsorları
Tədbir “S.I.G.N LTD” şirkətinin baş sponsorluğu, “Unimetal” və “Marsol Expo”nun sponsorluğu, Birbank Biznesin rəsmi tərəfdaşlığı, “Kanaat Alüminyum”un təşkilati dəstəyi, Dövlət Vergi Xidməti və “İR Master Group” MMC-nin tərəfdaşlığı, BHB Strategic & Creative Co. şirkətinin media tərəfdaşlığı ilə keçirilib.
Meslehetci olaraq biznes ictimaiyyətinin müxtəlif sahələr üzrə nümayəndələri ilə bir araya gəlməyi, sektorların inkişaf istiqamətlərini yaxından izləməyi və yeni işgüzar əlaqələrin qurulmasını əhəmiyyətli hesab edirik.
